LARKIYON KAY MASAIL AUR HAL:
Mard aur aurat kay genitals mein bohut farq hai. Iss farq ki wajah sey dono ek doosrey sey alag alag hain. Aurat kay genitals ko 2 parts mein divide kya ja sakta hai.
- Woh organs jinko hum bahir sey dekh saktey hain.
- Woh organs jo jism kay ander hotey hain aur jinko hum dekh nahi saktey hain.
Aurat kay baerooni aaza (external genitals) ko Vulva kaha jata hai. Jis hissey per baal hotey hain inko Labia majora kaha jata hai. Inn lips kay ander waley lips ko Labia Minora kaha jata hai. Labia Minora sexually bohut hi sensitive hotey hain.
Agar labia majora ko kuch khola jaey to aap dekhein gey kay sab sey neechey vagina hai, yeh ooper neechey 2 walls hoti hain jo kay aapas mein mili hoti hain. Vagina ki length 3.5 to 4.5 inches hai aur average 4 inch hoti hai. Mard iss mein mubashrat (Intercourse) karta hai. Isi sey mahwaari (menses) ka khoon bahir ata hai. Issi sey bachey ki paedaesh hoti hai.Vagina kay mouth kay kuch ander ek membrane hoti hai jisko hymen kaha jata hai.
Vagina kay kuch ooper peeshab ki nali hoti hai jis kay zariye urine bladder sey bahir aata hai. Iss kay ooper jahan labia minora khatam hoti hai waha bazer (Clitoris) hota hai jo pea sead kay baraber chicken ki kalghi ki tarhan hota hai. Iss ka size ¼ to 1/5 inch hota hai. Iss kay ooper ek hood hota hai. Sexually aurat ka sab sey sensitive part yehi hai. Jinsi lutf kay elawa iss ka koi aur maqsad ya kaam nahi.
Aurat kay internal genitalia mein ahem tareen organ G spot hai. Bazer (Clitoris) kay baad sexually yeh second sensitive part hai. Isey ek german gynecologist Earnest Grafenberg ney discover kya aur yeh issi kay name sey famous bhi hai. Agar aurat face aasmaan ki taraf kar kay letey to yeh uski umbilicus kay neechey vagina ki ooper wali wall mein 1 ta 1.5 inch ander ki taraf hota hai. Yeh ek chotey lobia ki shakal ka hota hai. Iski stimulation sey aurat zabardast orgasm hasil karti hai. Magar yeh orgasm musht zani (masturbation) aur mubashrat (Intercourse) kay orgasm sey mukhtalif hota hai. G spot kay stimulation sey 54% aurtein pani kharij karti hain. Vagina kay end per uterus hota hai jis mein baby ki growth hoti hai. Uterus amrood ki shape ka hota hai. Iss ki walls moti aur muscles ki bani hui hoti hain. Uterus ka munh vagina mein khulta hai. Uterus kay dono taraf left aur right 2 tubes hoti hain. Inko fallopian tubes kaha jata hai. Yeh tubes ek taraf uterus sey mili hoti hain aur doosrey end per ovaries sey mili hoti hain. Ovaries 2 hoti hain. Ovaries mein lakhon ki ta'adaad mein eggs hotey hain. Har month sirf ek egg ki growth hoti hai. Yeh egg left ya right kisi bhi ek ovary mein tayyar ho sakta hai. Qudrati tor per har month bari bari ovaries mein sey kisi ek sey egg nikalta hai. Ovulation kay waqt ek egg kisi ek ovary sey nikal kar fallopian tube mein aa jata hai. Doosri taraf sey mard ka sperm aata hai. Donon kay milney sey pregnancy ho jati hai. Yeh egg aur sperm mil jatey hain to phir uterus mein aa jatey hain. Jahan baby ki growth hoti hai.
Bara Bazer (Clitoris) Zyada Jinsi Khwahish Ki Alamat?
Individual difference ki wajha sey different khawateen kay bazer (Clitoris) ka size different hota hai. Aurat ka sexually most sensitive yehi part hai. Qadeem zamaney sey yeh khayal chala aa raha hai kay jin aurton ka bazer (Clitoris) big hota hai woh zyada jinsi khwahish(libido) rakhti hain.
Yani jitna big bazer (Clitoris) utni hi zyada jinsi khwahish. Doosri taraf woh aurtein jinka bazer (Clitoris) chota hota hai unki jinsi khwahish kam (low libido) hoti hai. Iss liye big bazer (Clitoris) wali aurton kay bazer (Clitoris) kay ooper wala kuch hissa cut kar diya jata hai takay zyada jinsi khwahish aur jazbat ki wajah sey woh sexually zyada active ho karbeyrahrawi ikhtiyar kar kay family ki badnaami ka sabab na banein. Aaj bhi Egypt aur doosri African countries aur America kay baaz hisson mein bazer (Clitoris) ka circumcision hota hai. Jab ka es nazariya ki koi haqeeqat nahi. Dekha gaya hai kay aisi aurtein jin kay bazer (Clitoris) ka size big hai woh sexually zyada active nahi hotiin. Doosri taraf woh aurtein jinka bazer (Clitoris) chota hai woh zyada active hoti hain.
Parda e Bakarat (Hymen):
Pakistan kay baaz elaqon mein suhag raat mein bed per white bedsheet bichai jati hai takay aurat ki virginity check ki ja sakey. Agar pehli raat bed per khoon laga hai to aurat ko virgin samjha jata hai warna iss ko foran divorce dey di jati hai. Yani agar khoon na nikley to isko badkirdar samjha jata hai. Hymen ki majoodgi ya adum-mojoodgi aurat ki virginity ka sign nahi. Merey ek naujawan client ney meri ek workshop "Shadi ki bharpoor khushi---Masail aur hal" mein shirkat kari aur phir iss ki shadi ho gaee. Shaadi kay next day us ka phone aya. Woh bohut hi pareshan tha aur biwi ko divorce deney ka soch raha tha. Pareshan iss liye tha kay iss ney successful mubashrat (Intercourse) kii magar iss raat uski biwi ko khoon nahi aya.
Hamarey yahan hymen kay silsiley mein bhi ghalat maloomat ki bharmaar hai aur iss ko virginity ka sign samjha jata hai. Yeh vagina kay hole mein zara ander ki taraf mojood hota hai. Magar yeh mukammal tor per vagina ko band nahi karta. Iss mein 1 sey 2 holes hotey hain takay mahwaari (menses) ka khoon nikal sakey. Yeh usually moon shaped hota hai lekin yeh size, shakal aur thickness kay lehaz sey mukhtalif aurton ka mukhtalif hota hai. Aksar aurton ka yeh hymen narm o nazuk hota hai aur pehli mubashrat (Intercourse) mein aasani sey rupture ho jata hai. Jis sey mamooli takleef hoti hai aur kuch khoon bhi nikalta hai. Baaz aurton ka hymen sakht gosht ka bana hota hai jo mubashrat (Intercourse) mein rukawat aur takleef ka sabab banta hai. Aisi surat mein minor operation ki zaroorat hoti hai. Baaz khawateen ka yeh hymen bohut hi elastic hota hai jo kay mubashrat (Intercourse) sey rupture nahi hota kyun kay yeh ander ko push kara ja sakta hai. Aisi surat mein aurat pregnant ho jati hai aur baaz surton mein to child birth bhi ho jati hai phir bhi yeh rupture nahi hota. Prostitutes iss soorat e haal sey khoob faeda uthati hain aur bar bar nath khulwai wasool karti hain.
Hymen ka hona ya na hona kisi bhi aurat kay virgin honay ka suboot nahi. Bohut si larkion ka hymen kisi accident ya uchal kood ki wajah sey rupture ho jata hai. Baaz ka musht zani(masturbation) ki wajah sey rupture ho jata hai. Issi tarhan mahwaari (menses) kay doran pads waghaera kay use ya safaee sey bhi phat sakta hai. Baaz khawateen ka paidaishi tor per mojood hi nahi hota aur kuch khawateen ka hymen khoon kay ikhraj aur takleef kay baghaer hi phatt jata hai. Baaz mahireen ka khayal hai kay zyada tar khawateen ka hymen paedaesh kay baad fitri tor per ahista ahista ghayab hona shuru hojata hai. Lehaza hymen ka na hona hargiz iss baat ka suboot nahi kay larki badkirdar hai. (Zakir: Mobeen: Hyde: Bechtel)
Baloghat mein larkyon kay jism mein bohut si tabdeelian aati hain. Inn mein ek ahem change pistaan (Breast) ka ubhar hai. Yeh ek medical kaifiyat hai. Yeh kaifiyat larki ko aurat bananey aur mother banney kay liye tayyar karney ki ibtidaee manzil hai. Aurat kay pistaan (Breast) ka ubhar husn ki alamat samjhee jati hai. Aurat kay jism mein pistaan (Breast) sab sey zyada prominent sexual characteristic hain. Na sirf mard bul kay aurtein bhi inn ko sexual sign samajhti hain. Aurton kay pistaan (Breast) chotey bhi ho saktey hain aur big bhi. Baaz elaqon maslan france mein chotey aur smart pistaan (Breast) zyada pasandeeda hain. Jab kay bohut sey doosrey elaqon mein big pistaan (Breast) husun ki alamat hain. Issi tarhan baaz afraad ko big pistaan (Breast) pasand hain aur baaz mard chotey aur smart pistaan (Breast) kay aashiq hotey hain. Pistaan (Breast) kay chotey ya big honay mein heredity, female hormones aur general sehat ka dakhal hai.
Jin elaqon mein big pistaan (Breast) pasand kiye jatey hain wahan unko barhanai ki bharpoor koshish ki jati hai. Wahan har khatoon ki khwahish hoti hai kay inn kay pistaan (Breast) big hon. Western countries mein khusoosan America mein pistaan (Breast) enlarge karney kay bohut sey tareeqey aazmaey ja chukey hain jin mein surgery bhi shamil hai. Magar iss mein koi khas kamiyabi hasil nahi hui.
Breast Size - Pistaan Ka Size:
Birth control ki tablets mein female hormones shamil hotey hain inkay istemal kay baad pistaan (Breast) size mein kisi had tak izafa ho sakta hai. Issi tarhan silicon ka injection dey kar bhi pistaan (Breast) ko artificially big kya ja sakta hai. Estrogen cream laganey sey bhi pistaan (Breast) kuch enlarged ho saktey hain. Surgery ki madad sey bhi inko big kya ja sakta hai. Magar surgery bohut khatarnak hai aur yeh surgery expensive bhi hai. Aisi surgery usually shaadi kay baad ki jati hai. Issi tarhan kuch log vacuum kay zariye bhi pistaan (Breast) big karney ka dawa kartey hain. Yeh system Pakistan mein bhi mojood hai magar iss sey koi farq nahi parta magar try karna mein kya harj hai. Shaadi kay baad specially bachey ki paedaesh kay baad khawateen kay pistaan (Breast) big ho jatey hain. Baaz khawateen kay pistaan (Breast) naram aur loose ho jatey hain aur inko exercise kay zariye hard kya ja sakta hai.
Kuch din pehley Kashmir sey ek 26 year old unmarried larki ney mujhey call ki woh apna large pistaan (Breast) ki wajah sey pareshan thee. Usually big pistaan (Breast) aurat kay husn ko dobala kartey hain magar agar yeh bohut big ho to inn ko sambhalna mushkil ho jata hai. Iss surat mein operation kay zariye unko small kya ja sakta hai. Magar un-married larkiyon ko iss ka mashwara nahi diya ja sakta. Kyun kay operation kay nishan nazar aatey hain. Iss tarhan husband kisi ghalat fehmi ka shikar ho sakta hai.
Baaz auqat ek pistaan (Breast) kuch big aur doosra kuch small hota hai. Yeh ek normal cheez hai. Na kay koi beemari. Iss kay elaj ki zaroorat nahi lekin agar yeh farq bohut hi zyada ho to shaadi kay baad surgery ki madad li ja sakti hai.
Issi tarhan baaz auqat ek pistaan (Breast) zyada sensitive hota hai aur doosra kam. Yeh bhi ek normal cheez hai. Baaz larkiyon kay pistaan (Breast) kay nipples kay bahir Areola kay erd gird kuch baal grow ho jatey hain yeh bhi ek normal cheez hai. Iss kay elaj ki zaroorat nahi. Agar chahein to inko aasani sey laser sey remove karaya ja sakta hai.
Bohut si larkiyan pistaan (Breast) kay tanau sey nijat hasil karney kay liye aur apni personality ko purkashish bananey ka liye bra ka estimal karney lagti hain. Baaz auqat woh tight bra pehenti hain takay tanau sey nijat hasil ho sakey. Magar yeh tareeqa sahi nahi kyun kay tight bra sey pistaan (Breast) ki growth ruk jati hai. Baaz larkiyan bohut loose bra use karti hain woh bhi sahi nahi, Iss sey pistaan (Breast) latak jatey hain. Lehaza bra na bohut zyada tight ho aur na hi bohut loose. Bul kay pistaan (Breast) kay size kay mutabiq ho. (Dastoor: Kawal Dheer)
BREAST CANCER: (CHAATI KA CANCER):
Breast cancer (Chaati ka cancer) puri duniya mein aam hai. Aurton kay cancer mein 25% khawateen sirf Breast cancer ka shikar hain. America mein 10% khawateen iss marz mein mubtila hain. Wahan har year 41000 khawateen iss beemari sey marti hain. Hamarey yahan yeh beemari nisbatan kam hai. Yeh beemari 40 ta 60 years ki age mein khawateen ko hoti hai. Agar kisi aurat ki dadi, nani, mother ya sister ko yeh beemari thee to aisi aurat ko iss beemari ka zyada khatra hota hai. Woh aurtein jo choti age mein bachey paeda karti hain aur woh aurtein jo bachon ko apna doodh pilati hain woh iss beemari sey mehfooz rehti hain. Agar iss beemari ka initial stage mein pata chal jaey to 10 mein sey 9 mareez sehatiyab ho jatey hain. Iss beemari ki diagnosis aap khud bhi kar sakti hain. Iss kay liye zaroori hai kay har khatoon apni pistaan (Breast) ka baqaida examination karey. Yeh examination har month mein ek baar zaroor hona chahiyie. Takay jitni jaldi pata chal jaey ga elaj bhi itna hi aasan hoga. Mahwaari (menses) kay doran examination nahi karna chahiyie kyun kay iss doran pistaan (Breast) mein fitri tor per lumps mojood hotey hain. Lehaza examination mahwaari (menses) sey pehley ya baad mein kya jaey. (Woman's Body)
Chaati Ka Muaina (Breast Examination):
Monthly examination kay liye apni shirt utaar kay ek big mirror kay samney kharey ho jaein. Arms donon side per latkey huey hun aur phir bari bari apney donon pistaan (Breast) ko ghor sey dekhein kay kahiin pistaan (Breast) ki external side per koi irregularities to nahi. Kahin koi dimple, puckering ya koi swelling waghaera to nahi. Phir arms ko head sey ooper uthaein aur doobara inn cheezon ko check karein. Dekhein kay nipples mein koi change to nahi. Agar koi irregularity nazar aaey to foran doctor sey contact karein. Phir palm ko nipples kay ooper rakh kay aram sey dabaein. Usually aurton kay donon pistaan (Breast) baraber nahi hotey hain. Phir ek ek nipple ko thumb aur finger mein pakar kay dabaein aur dekhein kay kahin khoon ya pus waghaera to nahi nikla. Nikley to foran doctor sey contact karein.
Ab bister per laet jaein. Right shoulder kay neechey pillow rakhein. Right hand ko sar kay neechey rakhein aur left hand sey apna right pistaan (Breast) ahista ahista dabaein aur check karein. Pistaan (Breast) kay har part ko daba kar check karein kay koi swelling ya lumps to nahi. Check kartey waqt pistaan (Breast) ki koi jagah na chorein. Phir issi tarhan left pistaan (Breast) ko check karein. Ab pillow ko left shoulder kay neechey rakhein aur left hand ko sar kay neechey aur right hand sey pehley ki tarhan tafseel kay sath left pistaan (Breast) ko check karein. Swelling ya lump ki soorat mein foran doctor sey contact karein. Baaz auqat lumps khatarnak nahi hotey. Har bar apna examination karney kay baad aap ko khushi hogi kay aap bilkul theek hain.
Barey Pistaan (Breast) Wali Khawateen Jinsi Tor Per Zyada Purjosh Hoti Hain?
Khayal kara jata hai kay big size pistaan (Breast) wali aurat zyada jinsi jazbat rakhti hai aur woh sexually zyada active hoti hai. Jab kay small pistaan (Breast) wali aurtein sex kay muamley mein zyada active nahi hotiin. Research sey sabit ho chuka hai kay pistaan (Breast) kay size ka aurat ki sexuality kay sath koi ta'alluq nahi. Small pistaan (Breast) wali aurat sexually zyada active ho sakti hai jab kay big size pistaan (Breast) wali aurat bilkul thandi.
Tahem sexually sensitivity kay lehaz sey pistaan (Breast) ka number 3rd hai jiska size kay sath koi ta'alluq nahi. Agarcha big pistaan (Breast) dekhney mein khubsoorat lagtey hain (Har shakhs ko nahi) magar aurat ki bharpoor azdawaji zindagi mein pistaan (Breast) size ki koi khas ahmiyat nahi bul kay tareeqa ahem hai. Jinka ham apni next book "Azdawaji Khushiyan" mein tafseel ka sath zikar karaingai. (Dastoor)
Chotey Pistaan (Breast) Mein Doodh Ki Kami Hoti Hai?
Kuch arsa pehley ek sahib ney mujhey call ki. Inki new marriage thee. Woh apni wife ka pistaan (Breast) size kay hawaley sey fikarmand thay jo kay unkay khayal mein bohut hi chotay thay. Inko bataya gaya kay pistaan (Breast) size kay aurat ki jinsi zindagi kay sath koi ta'alluq nahi. Inko asal fikar iss baat ki thee kay inn mein itna milk aa jaey ga kay inn ka babies ka pait bhar sakey. Yani woh bharpoor andaz sey apney bachon ko feed kar sakey gi. Pistaan (Breast) chahey kitna hi chotey kyun na ho milk paeda karney mein kotahi nahi kartey hain. Kisi aur wajah sey milk mein kami ho sakti hai magar pistaan (Breast) kay chotey honay sey milk mein kami nahi hoti.
Post a Comment